Karen Şarhon en Rio de Janairo 26 Avril – 4 Mayo

http://www.ustream.tv/embed/recorded/22218403

El Ochen CONFARAD en Rio de Janeiro 28 Avril – 01 Mayo 2012

El Ochen Confarad tuvo lugar este anyo en Rio de Janeiro, 4 dias yenos yenos kon konferensias, konsiertos, i aktividades. El fakto ke esto era el ochen Confarad es dizir koza importante. Las komunidades judias del Brasil estan muy aktivas i por esto son de felisitar.

Los konosi a estos buenos amigos en el kongreso de Erensya ke tuvo lugar en Sofia el anyo pasado. Me aviya sorprendido kuantos de entres ellos tenian raises en Turkiya o en el Imperio Otomano. Todos tenian una nostaljiya para muestra kultura i ya se viya ke keriyan mantener esta parte de sus identidad. David Gorodicht i su ermoza mujer me aviyan dicho ke kaliya ke viniera a Rio i avlar al puevlo en Judeo-Espanyol porke esto iva tokar los korasones de la djente.

La verdad dizirvos, no me ize rogar muncho para ir a Rio! Despues de un largo kamino de kaji 20 oras yegimos a esta sivdad maraviyoza. En Madrid mos topimos kon Marcel Israel de Bulgaria i kon Miguel de Lucas i Fernando Varraderey de Casa Sefarad-Israel. Kreyo ke fuimos los solos ke vinieron a este kongreso de la Evropa. Me sinti muy orgulyoza ke fui invitada para reprezentar la komunidad judiya de Turkiya, para munchos ayi, la Tierra Madre de sus abuelos!

Stella Garber ke konosemos del Ladinokomunita pishin vino a vermos al otel, uan mujer yena de enerjiya grasia i amistad. Estavamos situados en el famozo barrio de Copacabana i muy serka de la mar. Toda la koste de este barrio es una playa grande, koza de ver. El diya sigiente konosimos a la djente de la komunidad de ayi. Ya vos puedesh imajinar mi sorpresa kuando los vide. Todos paresen egzaktamente a la djente de mi komunidad aki, todos komo mis tias i tios. Para mi fue koza de ver. Las mizmas karas, los mizmos djestos, la mizma manera de avlar mizmo si es en Portugez ke estan avlando, mizmo la mizma manera de kaminar! Esto en munchos lugares i en munchos paizes lo aviya visto antes ama no me asperava a ver djente tan similar a mi puevlo en un paiz en el otro lado del mundo. Por fin esto diziendo ke mi puevlo es mi puevlo ande kere ke sea en las kuatro partes del mundo.

Una otra koza ke me sorprendio fue ke 300 personas incheron el salon de konferensias kada dia de la demanyana asta la noche. Esto no se tiene visto en Estambol por egzempio. Aki en Estambol, no puedemos topar 300 personas ke tengan la pasensya de oyir konferensias el dia entero! Ke felisidad de ver tanta djente interesada en muestra kultura en Rio. Me ambezi ke muncha de esta djente tienen raises en Turkiya. Fue muy sorprenante de oyir a personas ke diziyan ke su padre era de Milas, o ke su madre era de Edirne o ke su abuela era de Aydın. Tanta djente ke emigraron al otro lado del mundo para empesar una vida mueva i mijor de la ke tenian aki en Turkiya! Oyimos una konferensia (malorozamente en Portugez) sovre los djudias en las Amazonas. Asta aya se fueron en bushkidad de rikezas ma lo ke toparon fue una vida muy muy difisil. Rachel Bortnick mos aviya kontado sovre los djudios de las Amanzonas antes dos Amaneseres. Todo muy interesante.

Fui la sola persona ke avlo en Judeo-Espanyol! Sera muy difisil de kontarvos esta eksperiensa maraviyoza. Ke felisidad fue de ver las karas de todas estas personas ke me estavan mirando komo si una miraklo aviya okurrido! Siertos tenian lagrimas en los ojos i una vez mas me konvensi ke la prezervasion de esta lingua es muy importante para tambien prezervar parte de muestra identidad. Les avli, les kanti i les mostri un powerpoint kon fotos, palavras de kantikas i tambien komidas de chupar los dedos! Las palmas no kedaron por munchos minutos despues de mi konferensia. Para mi gudrura! (No es ke necesito mas gudrura ama esto fue una eksperiensa inolvidavle).

Uvo munchas konferensias sovre un monton de sujetos: uvo avlas sovre las komunidades judias de Brasil, sovre las komunidades judias Latinoamerikanas, sovre los sefardis del Mediterraneo, sovre el Olokausto i la fundasion del estado de Israel, sovre la situasyon politika en el Medio-Oriente, sovre sujetos relijiozos i sovre la prensa sefardi en muestros dias. Aki kero mensyonar el muy simpatico Ambasador de Israel, el Sr. Rafael Eldad. Munchos diplomatikos vide en mi vida ma muy pokos tan simpatiko i amistozo. Komo dizimos mozotros, “un Pasha de ombre”. El mos konto ke empeso su karyera diplomatika en Turkiya en Ankara (el mundo es muy chiko!) i ke despues estuvo munchos anyos en Argentina. Siguro ke izo munchos amigos ayi i ya se viya la amistad ke tenian unos por los otros espesialmente kon los keridos Sultanis, un marido i mujer de los mas simpatikos i karinyozos.

Liliana i Marcelo Benveniste de Buenos Aires

Kero apartar un lugar spesial para estos dos amigos, Liliana i Marcelo. Unos bonbones de personas, no se komo deskrivirlos en otra manera. En primer lugar es siempre un grande plazer ver un marido i mujer kazados por munchos anyos i ainda tan ennamorados el uno del otro. Liliana, eya ermoza, talentuoza i dedikada a lo ke aze, muy simpatika i muy karinyoza. Marcelo, un Pasha por ijo, muy intelijente i muy kapachi. Tuve el grande plazer de estar kon eyos lo mas del tiempo ke estava en Rio i de adelantar muestra amistad ke aviya empesado en la izla de Rodes antes unos kuantos anyos ma ande no aviyamos tenido la oportunidad de konosermos de mas serka.

En primer lugar kero avlar de lo ke izo Marcelo en este kongreso. El save utilizar la teknolojiya moderna muy muy bueno, es por esto ke pudo filmar todo lo ke se izo i publikarlo en bivo en akel minuto en el internet! Todo el mundo pudo suivar lo ke estava okurriendo en Rio minuto por minuto i disfrutar de las konferensias. Esto fue una aktividad muy avansada teknolojikamente i se debe de mensyonar kon grande admirasion para Marcelo i todo lo ke izo. Felisitasyones Marcelo, bravo!

Liliana i Marcelo son los editores de eSefarad, la prensa sefardi en el internet, una publikasyon ke empeso chiko i ke agora es muy impresyonante. Todos estuvimos de akordo ke el futuro de muestra kultura sera en el internet alora kale mirar modos i maneras de utilizar esta media a fondo i azerlo aksesible al mundo entero. Es por esto ke eSefarad es muy importante. Es un medio para munchos de ekspresar lo ke keren dizir sin muncho gaste.

Agora kero avlar un poko sovre Liliana. Liliana mos dio dos konsiertos en estos dias i todos los dos konsiertos me enkantaron. No es fasil tener la atension de la djente kuando sos solo una mujer en la shena sin muzikantes, sin nada, ma Liliana lo izo fasilmente, kon su stilo de kantar, su ermoza boz i su djilve enkantador! Me toko el korason kuando kanto tangos en Judeo-Espanyol, una maraviya de kantes konosidos ma ke nunka enfasyan de sintirlos. Fue un privilejyo de sintir a Liliana kantar i fui muy onorada ke me invito a kantar en duet kon eya. Kantimos su version de Bre Sarika i mos divertimos muncho.

En la vida de una persona ay momentos kuando konoses a personas muevas ke sientes un klik arientro tu korason i ke dizes, “si, esta es material de buena amiga”. Esto es lo ke sinti kuando mijor konosi a Liliana i Marcelo, unos kuantos klikes!

Kero rengrasiar a todos los amigos del Confarad por esta organizasyon en partikular a David Gorodicht Albagli i a Stella Garber ke fueron komo ermanos para mozotros. Tuve la okazyon de konoser a djente maraviyoza i torni a mi kazika i a mi famiya oroza i kontente de aver tenido una eksperiensa tan ermoza.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s